塞咗‧通咗

波 波左眼睇完王醫生都係時好時壞，'得'低頭食吃完嘢、飲完水，左眼就流眼水，我懷疑係淚管塞咗，於是book咗星期六俾羅醫生再check吓，羅醫生同波波測試淚水分泌濕度，再滴黃藥水落眼測試淚管通往鼻腔通道，兩分鐘後熄燈照鼻腔，鼻腔見唔到黄藥水，唉.....真係俾我批中.....淚管塞咗！
羅醫生笑笑口﹕瑩光眼，幾形

亞咪﹕係喎....影返幅相先
波波﹕Ｘ义ＹＺ........
羅醫生望吓手機﹕真係影到喎

羅醫生開一星期藥（Vetri-Lysine Plus Softchews）加一支眼水，一星期後覆診。
波波雖然係診症室俾醫生舞完一輪，但出返嚟等攞藥期間，依然鬼咁啖定，仲眼仔碌碌周圍look

 

  

 

   波波嚟咗我處年幾都無過去探過佢親生媽咪（亞銀），嗰日同佢行一轉，順便買粒杜蟲藥，老公驚裹面貓多、細菌多，齋企係門外俾波波望吓.....佢媽咪又生咗貓b、揍緊b...

  亞咪﹕波波......菲菲吖，你認唔認得？
  波波﹕唓....認咩....我都未嚟過呢度......
  亞咪﹕係喎....你唔係係呢間舖出世喎（菲菲舊年由油麻地搬咗嚟旺角樓上舖）
    咁...你認唔認得生你嘅媽咪？
 波波﹕mm......
 亞咪﹕呢....埋邊揍緊b，同你一樣咁矮呢.....
 波波﹕唔係化.....見到矮婆就叫我認亞媽   
 亞咪﹕唉.....生仔有咩用，親生亞媽都唔認得！

呢個星期三開始,波波做咗乞痴大魔王....正衰仔！你梗係要羅醫生day off 先嚟玩嘢，佢打乞痴打到我肉都赤埋，雖然老公話觀察住先....但我個心硬係囉囉孿，唔理咁多.....今朝自己揹隻波提早覆診......
羅醫生話波波無咩眼水流，淚管應該通咗......我叫醫生再滴黃藥水confirm吓.....
亞咪﹕波波係咁打乞痴，唔知係米感冒？
羅醫生﹕吓......無鼻水、鼻涕應該唔係....
亞咪﹕咁會唔會係淚管通返而眼水刺激到鼻腔？
羅醫生﹕有咁嘅可能....又可能敏感....屋企有無人吸煙？
亞咪﹕無....

滴完黄藥水等兩分鐘期間﹕
 
女助護攬住波波﹕都幾好脾氣喎，平時乖唔乖？
亞咪﹕都o.k.乖.....
羅醫生﹕呢隻嘢幾靚.....
亞咪﹕得嗰殼.....
羅醫生﹕吓？
亞咪﹕佢好鬼麻煩，九亞幾種嘢敏感...
羅醫生笑笑口﹕名種貓....係咁喇.....

跟手問埋波波下巴嘅黑芝蔴，醫生話係粉刺之類嘅嘢，唔係好嚴重，用鹽水或暖水清潔吓﹔嚴重到發炎先要揸藥膏，我表示成兩個月都唔痊癒，咁佢就開支藥膏，每日揸一次........頂！原來有藥揸.....之前問過嗰條友兩次都唔開俾我


睇完vet回歸，隻波食完雞粒，飲完水，放埋堆米田共就上床昏瞓，臭波好似仲過攰我咁.......難為我咩你咩到shounder鬼咁痛

 都係幫佢蓋返件羽絨褸穩鎮啲！


波波﹕我啲好好味嘅美國雞粒就嚟食哂喇.....亞咪話揾唔到人幫手訂